AITC կենտրոնի աշխատակիցը և դասընթացի մասնակիցը Հայաստանի Հանրային ռադիոյում

AITC կենտրոնի «Բազային համակարգչային գրագիտություն մեծահասկաների համար» դասընթացը շարունակում է իր կարևոր առաքելությունը՝ տեխնոլոգիաների աշխարհը ավելի մատչելի դարձնելով մեծահասակների համար: Այս առաքելության շրջանակում Հայաստանի Հանրային ռադիոն հյուրընկալել էր մեր դասընթացների համակարգող Սիրանուշ Միսակյանին և ծրագրի մասնակից Սիրանուշ Չանգալյանին՝ ներկայացնելու դասընթացի մանրամասներն ու դրա ազդեցությունը մասնակիցների կյանքի վրա։

Դասընթացն ընդգրկում է համակարգչային հիմնական հմտությունների ուսուցանում՝ սկսած առաջին քայլերից մինչև ամենօրյա կարևոր գործառույթների կիրառումը։ Սիրանուշ Միսակյանի խոսքով՝ դասընթացը սովորեցնում է, թե ինչպես ճիշտ միացնել և անջատել համակարգիչը, ինչպես օգտվել մկնիկից, ինչպես բացել և օգտագործել էլեկտրոնային փոստը։ «50 և ավելի տարեկան ցանկացած անձ, անկախ նրանից՝ աշխատում է, թե կենսաթոշակառու է, կարող է դառնալ այս անվճար ծրագրի շահառու և ձեռք բերել կարևոր թվային հմտություններ»,- նշեց նա։

Ծրագրի մասնակից՝ Սիրանուշ Չանգալյանը կիսվեց իր փորձով՝ նշելով, որ, չնայած որոշ մարդիկ փորձել են հետ պահել իրեն թվային հմտություններ սովորելուց, նա վստահ առաջ է շարժվել և այսօր ինքնուրույն է համարգչով կատարում անհրաժեշտ բոլոր գործողությունները։

«Ես իրենց ասացի՝ գիտեմ, բայց կան բաներ, որ չգիտեմ։ Եթե նոր բան էլ չլինի, ոչինչ, կկրկնեմ: Շատ օգտակար է եղել ինձ համար, օրինակ, արդեն հստակ գիտեմ՝ ինչ է սպամը, ինչը բացեմ, ինչը՝ ոչ»,- նշեց Սիրանուշը։

AITC/EIF-ի այս նախաձեռնությունը վառ ապացույցն է, որ կրթությունը սահմաններ չունի, և յուրաքանչյուր մարդ կարող է յուրացնել նոր տեխնոլոգիաները՝ անկախ տարիքից։ Այս դասընթացը մեծահասակների համար բացում է նոր հնարավորություններ՝ դարձնելով թվային աշխարհը հասանելի և հարմարավետ։ Հաղորդման մանրամասներ

Տեսնել այստեղ